Служба на Собор Карельских святых

Скачать в формате "Word" >>>

На Господи воззвах, глас 6: Земля веселится и небо радуется,/ отцы преподобнии/ восхваляюще подвиги и труды ваши,/ душевное благомощие и ума чистоту/ законом бо естества не победистеся./ О, соборе святый и полче божественный// земли нашей утверждение вы еси воистинну.

Приидите вси концы земли,/ псалмы и песньми незаходимого Света,/ великаго светильника вселенней воспоем вси Александра Свирского,/ паче бо солнца возсия в твердыни веры/ и верных собрание и добродетелем настави./ Того молитвами, Христе Боже наш,// православных веру утверди, яко Человеколюбец.

Евангельски, преподобнии Зосимо, Савватие и Германе/ Христа возлюбивше,/ мира отвратитеся,/ в непроходимыя же и в пустыя острова Соловецкия зашедше,/ всякия добродетели образу навыкосте,/ мудрой пчеле подобяшеся,// и приятелище изрядно Духу Святому бысте премудрии.

Радуйся пустыне, прежде безплодна и необитаема,/ послежде яко крин цветущая,/ взыграйте, горы Валаама и вся древа дубравная,/ хваляще с нами Сергия и Германа,/ вкупе же Арсения и Германа с Александром Свирским,// отцы всехвальныя.

Преподобнии отцы Богомудрии,/ Никифоре и Геннадие, Пахомие и Кирилле,/ слепым даете свет, болящим изцеление,/ милостиво приклоняющеся и приходящим с верою/ и просящим помощи вашея,/ заступники бо и предстатели вернии вси обретохом,// восхваляюще любовию вас.

Слава, глас 8: Ликуй, Фиваидо русская,/ красуйся пустыни и дебри Олонецкие,/ возрастившия святое и славное отцев множество,/ чудным житием всех наставляюще,/ миру не прилеплятися,/ крест свой на рамена взяти,// и во след Христу шествовати.

 

На стиховне, глас 2: Святых память велие торжество явися земли нашея:/ сии бо воистину делы и словесы и многовидным житием,/ и от Бога дарованием соделашася святи./ И ныне прославльшему их Христу предстояще,/ молятся о нас прилежно,// любовию совершающих светлое их торжество.

Стих: Честна пред Господем смерть преподобных Его

Преподобнии отцы всечестнии,/ Лазарю и Афансие,/ добродетельми возшедше на колетсницу,/ и к Богу востекосте/ победныя почести приемлюще.// Темже блажим вас, прехвальнии.

Стих: Блажен муж, бояйся Господа, в заповедех Его восхощет зело.

Ликом постническим сочетастеся,/ преподобнии Ионо и Лонгине,/ и ныне в небесных обителех живете/ веселящеся идеже ликуют Ангели,/ поминайте любовию блажащих вас на земли,// и святое ваше творящих празднество.

Слава, глас 3: Преподобнии отцы, мира красоты и пищи временныя возненавидевше/ и иноческое житие возлюбивше,/ Ангелом собеседницы бысте/ и светильницы многосветлии земли нашей,/ чудесами, яко второе солнце сияете,/ но о всех нас поминайте, совершающих священную памятть вашу,/ мы бо чада ваша,/ вас на помощь призываем,// просяще вами прияти мир и велию милость.

По Евангелии, глас 6: Иже на земли Ангелы,/ и на небеси человецы Божии,/ мира благое украшение,/ и благих питатель удобрение,/ монахов и преподобных похвалу,/ всех святых Карельских почтим,/ насаждени бо в дому Господни,/ и процветоша праведно,/ и яко кедри в пустыни умножили стадо Христово словесных овец,// в преподобии и правде.

 

КАНОН, глас 2

Всем святым в земли Карельстей просиявшим

Егоже краегранесие: СОБОРУ КАРЕЛЬСТИХ СВЯТИХ ВОЗНОШУ ПЕСНЬ !

Песнь 1

Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетская, яко прославися.

Припев: Вси святии земли Олонецкой, молите Бога о нас.

Светильников светлых множество на свещнице церковней яви Господь, щедро насеявый святое и славное отцев наших множество в земли Олонецкой просиявших.

Огнь Божественный возсия и оживотвори зде пустыню, прежде безплодну и необитаему, последиже, аки крин процветшую, инок множество взрастившую, яко и вас, цветы присножизненныя и Богопрозябенныя, Сергие и Германе Валаамские.

Благодаряще, поим песнь Христу, пославша нам Зосиму, Савватия, Германа Соловецких чудотворцев, кии иже мира отвратистеся, в непроходимы и пусты острови Соловецкия вселистеся, претерпением лютых мук тленная на нетленная пременили есте, превечному Богу угодили есте.

Богородичен:

Образу кротости, Богородице, поим песнь, славяще рождество Христа Бога непостижимое, и вопием Ей: помилуй стадо Твое, едина Всепетая.

Песнь 3

Ирмос: На камени мя веры утвердив, разширил еси уста моя на враги моя; возвесели бо ся дух мой, внегда пети: несть свят якоже Бог наш, и несть праведен паче Тебе, Господи.

Родником святости, Господи, сохрани землю Олонецкую, и даждь ей быти ненаветну от врагов и даруй на сопротивных победу и одоление.

Утверди нас в Тебе, Господи, любовию явивша Своих собеседник Александра Свирскаго и Елисея Сумскаго, каковых искуси и обрете достойны Себе, ихже и гробы чудесы прослави.

Киими песньми восхвалим угодников Божиих, мужей высокаго духовнаго совершенства, Лазаря и Афанасия Муромских, пустыню обителию святыя украсивших, светом веры Христовы лопарей просветивших.

Богородичен:

Ангел Святейшая, Богородице Дево, под Твой кров притекаем, Владычице, людие Твоя, Помощнице буди нам, рабом Твоим, и спасения Подательнице.

Песнь 4

 

Ирмос: Пришел еси от Девы, не ходатай, ни ангел, но Сам, Господи, воплощся, и спасл еси всего мя человека: тем зову Ти: слава силе Твоей, Господи.

Радостно, едиными усты и сердцем величаем вас, святии земли Олонецкой, и чтим святую память вашу, вы бо молите о нас Христа Бога нашего.

Единонравно на земли живя, земная мудрствовати презирали есте, плоть угнетали есте, весь ум вперяя ввысь, богомудре Геннадие и Никифоре Важеозерские, отцы всехвальныя.

Любовию провидя славу земли Северныя, Антоний Римлянин, достославный, от ветхаго Рима на камени по волнам морским преплыл еси и веру правую зде утвердил еси.

Богородичен:

Свет рождшая Божественный, стала еси, Богородице Дево, Заступницей мира холоднаго.

 

Песнь 5

Ирмос: Света подателю и веков Творче Господи, во свете Твоих повелений настави нас: разве бо Тебе инаго Бога не знаем.

Тихое и доброе пристанище яви нам Господь, в земли Олонецкой Божественный Свой виноград насадивши, из коего вино чудное источивши, спасительным напитком сим нас напояющи.

Источил еси любовию, Христе Боже, угодников Своих, коих терпеливе растил еси на добрых пажитях, вас, дивнии преподобнии, Авраамие и Корнилие Палеостровские.

Хвала Ти, Господи, яко Сам содержиши в руце Своей души праведных, кои слезными потоки души напоили есте, непорочнаго жития духовное благомощие явили есте, вас, преподобнии отцы наша, Ионе Яшезерский и Ионе Клименецкий.

Богородичен:

Совершенное спасение душ наших, Богородице Дево, Ты бо еси нам святое ограждение и источник исцеления.

 

Песнь 6

Ирмос: В бездне греховней валяяся, неизследую милосердия Твоего призываю бездну: от тли, Боже, мя возведи.

Воспеваем вас, вси святии земли Олонецкой, яко противу начал и властей злобы дерзновенно ополчистеся и тех коварства любовию и смирением победисте.

Яко звезд пресветлых Церковь яви вас, вернии раби Господни, Пахомие Кенский, Александре Ошевенский, Кириаче Каргопольский, шествовавших токмо узким путем: постницы, в алчбе и жажде временное житие проводившии; послушницы, Христово смирение стяжавшии, молитвенницы, блаженство плача о гресех познавшии.

Трудницы Господни, преподобнии отцы наша Афанасие Сяндемский, Елеазарие Анзерский, образ злострадания и терпения показавшии, страстей прилоги и козни вражии попалившии, поругания яко врачество чистительное пившии.

Богородичен:

Исцелений неоскудное Сокровище еси нам, Богородице Дево, молим Тя, Владычице, даруй нам душ очищение и от бед свобождение.

 

Песнь 7

Ирмос: Божия снизхождения огнь устыдеся, в Вавилоне иногда. Сего ради отроцы в пещи, радованною ногою, яко в цветнице, ликующе, пояху: благословен еси, Боже отец наших.

Храм Господний суще, святии отцы наша, любве Его ради живота своего не щадившии, мир и миродержателя тьмы победившии, вся сети древняго змия, яко паучину, разорили есте, ликующе, пояху: благословен еси, Боже отец наших.

Возсияли в мире, яко светильницы светлии, преподобнии отцы наша, Адриане Ондрусовский, Киприане Сторожевский, неусыпающую скорбь о гресех стяжавшии, слезы многи о них познавшии, послушанию и смирению Спасителем научении, темже Господем Славы вознесеннии.

Обитель Духа Пресвятого явилися есте, преподобнии отцы наша Никодиме Кожеозерский, Евфимие Карельстий, многими скорьбми в Царство Небесное вшедшии, труды, подвиги, слезы, поты, страдания претерпевшии.

Богородичен:

Заря и Светоносная сене Небесная, Богородице Дево, Свет необъяснимо рождшая, просвети, Владычице, и наша сердца и души.

 

Песнь 8

Ирмос: Победители мучителя и пламене благодатию Твоею бывше, заповедем Твоим зело прилежаще, отроцы вопияху: благословите вся дела Господня, Господа.

Неотмирной жизни образ явившии, избрание свое подвигами благочестия оправдавшии, образом дел и трудов правый путь к Небеси нам показавшии, преподобнии отцы наша, молите Бога о нас.

Основание непоколебимое Церкве явили есте, отцы наша, благое иго Христово люботрудно понесшии, Христа ради всеконечно себя отвергшиися, преподобнии Кирилле Челмогорский, Арсение Коневский, Диодоре Юрьегорский, в терпении вашем души ваша стяжавшии, благодарити Господа николиже преставшии.

Широкий путь греха презрев, путем тесным и прискорбным до конца дней шесвовавшии, крест свой на рамо возложившии, преподобнии отцы наша Варлааме Керетский, Евфросине Курженский, Кассиане Соломенский, безгневия и кротости смирением достигши, плоть духу поработили есте.

Богородичен:

Угаси в нас пламень греховный, Богородице Дево, совместно со Апостолы волю Сына Своего любовию творившая, темже молим Тя: умири и наша страждущия сердца.

 

Песнь 9

Ирмос: От Бога Слова, неизреченною мудростию, пришедшаго обновити Адама, ядию в тление па-дшего люте, от Святыя Девы неизреченно воплотившагося нас ради, вернии единомудренно песньми величаем.

Песньми величаем вас, преподобнии, вся хотения Господни исполнившии, мнози скорби в мире претерпевшии, в молитве Богу собеседовавшии, житием своим диавола поправшии, на Небеса со славою возведеннии, с лики ангельскими в вечныя обители Отца Небеснаго вселеннии.

Единоверцы, преподобнии отцы наша, Елеазаре и Назарие Олонецкии, поим вам, всякое плотское пристрастие вседушно отвергшии, едино на потребу чрез подвиги велии взыскавшии.

Святаго блаженнаго Фаддея Петрозаводскаго, ублажаем, яко отвержением себе Христу последовал еси, трудным подвигом юродства разум Христов явил еси, много претерпел еси, ныне в покой Царствия Небеснаго вшел еси.

Богородичен:

Надеждо ненадежных, нечаянная Радосте наша, Богородице Дево величаем Тя, Ты бо еси истинное всех верних духовное возрождение и спасение.

 

На хвалитех, глас 4: Преподобнии отцы земли Карельской,/ бысте цвети духовнии земли нашея/ утверждение и сокровище неистощимое,/ вас стяжавше прославляем прославльшего вас Господа:// Ему же молятся, даровати душам нашим велию милость.

Срадуйтеся нам, всех верных множество,/ сликовствуйте, горы и холмы, море, и вся яже в нем,/ в светоносный день памяти дивных постников, Сергия и Германа,/ на горах Валаамских,// яко финикс процветших.

Приидите, празнолюбцы и постническое сословие,/ верою сошедшеся,/ истинных постников почтим днесь Зосиму и Савватия./ О, всеблажебннии,/ преподобным сожителие и постников похвало,/ о нас молитеся ко Господу //помиловатися душам нашим.

Слава, глас 6: Преподобнии отцы земли нашея,/ поучившеся день и ночь в законе Господни,/ сподобистеся древа животнаго снасаждени быти,/ и плод вашего страдания венцы процвете,/ дерзновение имуще к Подвигоположнику Богу,// и нам испросите очищение и велию милость.

И ныне, глас тойже: Богородице Дево,/ упование христианом,/ пробави и нам древния милости Твоя,/ бывшия отцем нашим,// покрый и соблюди нас от всякаго зла.

 

Тропарь Карельским святым, глас 8: Якоже плод красный Твоего Спасительнаго сеяния,/ земля Карельская приносит Ти, Господи,/ вся святыя в той просиявшия./ Тех молитвами в мире глубоце,// Церковь и страну нашу Богородицею соблюди Многомилостиве.

Кондак, глас 3: Днесь лик святых в земли нашей Богу угодивших,/ предстоит в Церкви и невидимо за ны молится Богу:/ Ангелы с ним славословят,/ и вси святии Церкви Христовы ему спразднуют,// о нас бо молят вси купно Превечнаго Бога.

Величание: Величаем вас/ вси святии в земле Карельской просиявшии,/ и чтем святую память Вашу,/ вы бо молите о нас// Христа Бога нашего.

Святые Карелии

На главную